Home' Trinidad and Tobago Guardian : July 30th 2015 Contents B4
Guardian www.guardian.co.tt Thursday, July 30, 2015
Ah hear me pardna Cow tellin he sidekicksman
Egret de udder mornin when sky bawlin wit Kick
Em Jenny reflux: "Boy Ah does real miss dem
heavy cake, like wha dey uses tuh mek in de Earl
Lovelace tory yunno."
Egret jess stannin up dey flickin rain orf he beak,
stoical. "Hmm gyul, Ah cyar say Ah does miss dem
blasted drop scone, dat is tunder. When yuh peckin
fuh raisin is only bent beak or wuss again, mash up
foot when de ting fall.
Nah gyul, gimme dem fancy light pastry we pardna
in Martnik does melt in dey mout, or better still
hit me a two shotta tres leches, like all dem in Puerto
Rico slipping dong dey troat."
Cow not impress, not wit Egret response nor the
lack of umbrella.
She say she feel dat in dis meetin, wit all de light-
weights mekkin tantana brorff tuh tief dotish human
belly an head, it require some gravitas, someting
heavy nah, tuh bring dem back dong from de unlim-
ited horizon of foolishness an folly, right back tuh
de mud, which part dey creep out from in de fuss
All now Egret foot swamp in de deluge an he tek
a hop on Cow shoulder. "Lissen up guajida, yuz a
mudder jes like me buh dat doh mean we had tuh
play country bookie or duncie. Is how long we limin
togedder in dis here field?
Long days, long long days yes, an dat mean we
witnessin de flight from one setta mud tuh de nex,
what all dem cowbwoy and cowgyul tellin deyself
is Progress and de Future an how if it come on a
plane and costs ten time as much as in de market
or de grocery, dat is fuh we.
Yuh feel anyone studying gravy arse or whateva
dat big wud yuh swallow? Dem done wit home
cookin like dey done wit de lan. Tawa, chula, coalpot
and fireside gone tru. Is only Wendy (from away-
not dat gyul from south), Mac and de Colonel ridin
Cow shudder as how Egret steppin on she dreams
along wit she family an she tink she miss de morning
In one of she cow stomach she have de uneasy
feelin Egret talkin de troot. She tired how much of
she family de humans lickway in dem hoggishness,
an no matter how hard she try, she cyar digest de
recipe fuh progress, which lookin more an more like
regress tuh she. "Hear nah Eegs, like dem progress
cooks missin something ent? Ah not too sure dey
could read de cookbook self. Like dem eider cookin
de book or dey blowin up de kitchen."
"Look we crosses yes," Egret concur cockin he
head an he belly rumbling, "Yuh cyar truss dem
tuh do nutten buh mek comess, commit murder,
larff kickskadee an party. See dem in de
fowl coob right dey in tong, dey rippin
out head an callin it trim, fedders flyin an
dey playin Wild Indian. Who eh dead got
price on he head an a lorry load of hitman
pullin straw tuh see who go tek de fuss
shot. Kapow! Yuh dead! Who dead? Alla
we dead an who go pay?"
"Lissen nah man Eegs, yuh know dis
is a country whey nobody doh pay fuh
nutten-unless yuh poor an chupid. De
more yuh tief, lie an kill, is de bigger yuh
Yuh is hero an heroine an who dotish
enough tuh lock yuh up? Dat is pappyshow,
cor lockup only mean-till when yuh pardna
open up de cell door, hand yuh weapon
an key an say- Yuh free like me. "
Egret well tinkin breakfuss long gone
and lunch eh showin an he start tuh vex.
"Buh wha de Ramses really goin orrn? If
dis is progress den me name is Sushi.
Twenty five year come and gone an we
cyar remember whappen yesterday self.
Same crooked cooks stirring de pot which
blow up in all we face back in 90. Same
poison dey brewing like is a pepperpot
never come off de fire.
An nobody tuh answer fuh nutten. Who
dead, dead an forgotten, buh dem like we,
who studyin we here in dis field?
Is true de poor shall inherit de earth,
dey had nutten else tuh gain ceptin tuh
lie dong in de mud like we."
Cow raise she head, lookin for a patch
of blue in de storm sky, a way out de mud.
"Like dis rain never go done.
We eh cookin wit gas, we jes playin de
ass. Is like de lorrst watch Lion sing bout.
Everbody lookin lookin lookin an pointin
finger. Buh dis pepperpot ready tuh kill de
nashun becor we watchin in de wrong place.
We had was tuh know who it is cookin
de cooks an dey surely not in de kitchen."
Links Archive July 29th 2015 July 31st 2015 Navigation Previous Page Next Page